Skip to main content

Hodan Hospital

Isbitaalka Hodan iyo Isbitaalka Jaamacadda Bariga Afrika Boosaaso oo kala saxiixday heshiis.

Isbitaalka Jaamacadda Bariga Afrika Magaalada Boosaaso iyo Isbitaalka Hodan ayaa maanta si rasmi ah u kala saxiixday heshiis iskaashi oo lagu xoojinayo wada-shaqeynta dhinacyada adeegyada caafimaadka, tababarrada xirfadlayaasha caafimaadka, is-dhaafsiga khibradaha, iyo horumarinta tayada daryeelka bukaannada.  Heshiiskan ayaa saldhig u noqonaya iskaashi waara oo u dhexeeya labada isbitaal, iyadoo ujeeddadiisu tahay in kor loo qaado tayada adeegyada caafimaadka, la horumariyo aqoonta iyo xirfadaha shaqaalaha caafimaadka, isla markaana bulshada Soomaaliyeed loo fidiyo adeegyo caafimaad oo tayo sare leh. Iskaashigan wuxuu sidoo kale dhiirrigelinayaa is-weydaarsiga aqoonta, horumarinta xirfadaha, iyo wadaagista waayo-aragnimada caafimaad ee labada hay’adood, si loo xoojiyo tayada daryeelka bukaannada.  Mas’uuliyiinta labada isbitaal ayaa sheegay in heshiiskani uu yahay tallaabo muhiim ah oo lagu xoojinayo iskaashiga hay’adaha caafimaadka Soomaaliyeed, isla markaana door ka qaadan doonta horumarinta adeegyada caafimaadka iyo daboolidda baahiyaha sii kordhaya ee bulshada.

Isbitaalka Hodan oo Soo Dhaweeyay Wasiirka Wasaaradda Dekedaha iyo Gaadiidka Badda Dowladda Federaalka Soomaaliya, ahna Musharrax u Taagan Xilka Guddoomiyaha Golaha Shacabka Baarlamaanka Jamhuuriyadda Federaalka Soomaaliya.

Isbitaalka Hodan ayaa maanta soo dhaweeyay Wasiirka Wasaaradda Dekedaha iyo Gaadiidka Badda ee Dowladda Federaalka Soomaaliya, Xildhibaan Cabdulqaadir Maxamed Nuur (Jaamac), oo sidoo kale ah musharrax u taagan xilka Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya. Wasiirka waxaa booqashadiisa ku weheliyay wasiirro iyo xildhibaanno ka tirsan Dowladda Federaalka Soomaaliya, Xoghayaha Golaha Mihnadlayaasha Caafimaadka Qaranka, xubin ka tirsan Guddiga Tacliinta Sare, iyo marti sharaf kale. Wafdiga waxaa xarunta Isbitaalka Hodan ku soo dhaweeyay Dr. Mohamed Isxaq, Agaasimaha Guud Isbitaalka Hodan, kaas oo warbixin ka siiyay adeegyada caafimaad isbitaalku bixiyo, horumarka uu sameeyay, iyo qorshayaasha lagu sii xoojinayo tayada daryeelka caafimaadka ee bulshada Soomaaliyeed. Intii uu kulanku socday, Wasiirka ayaa maamulka Isbitaalka Hodan uga warbixiyay qorshihiisa la xiriira horumarinta daryeelka caafimaadka ee xildhibaannada Baarlamaanka Federaalka Soomaaliya. Wuxuu sheegay in haddii uu ku guuleysto xilka Guddoomiyaha Golaha Shacabka Baarlamaanka Jamhuuriyadda Federaalka Soomaaliya, uu ka shaqeyn doono hirgelinta caymis caafimaad oo ay ka faa’iideysan doonaan 275-ka xildhibaan Golaha Shacabka iyo qoysaskooda, si loo xaqijiyo helitaanka adeegyo caafimaad oo tayo leh. Maamulka Isbitaalka Hodan ayaa uga mahadceliyay Wasiirka iyo wafdigiisa booqashada ay ku yimaadeen isbitaalka, waxayna u rajeeyeen guul iyo wanaag tartanka uu ugu jiro xilka Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya

HODAN HOSPITAL Iyo HEELAN HOME HEALTHCARE Oo Kala Saxiixday Heshiis Iskaashi Oo Lagu Xoojinayo Adeegyada Caafimaadka Guryaha.

Hodan Hospital iyo Heelan Home Healthcare ayaa maanta si rasmi ah u kala saxiixday heshiis iskaashi oo lagu xoojinayo adeegyada daryeelka caafimaadka ee lagu bixiyo guryaha iyo goobaha shaqada, si bulshada Soomaaliyeed loogu fududeeyo helitaanka adeeg caafimaad oo joogto ah. Heshiiskan ayaa u sahli doona bulshada Soomaaliyeed, gaar ahaan bukaannada ku xiran Hodan Hospital, inay helaan adeegyo caafimaad oo tayo leh iyagoo jooga guryahooda ama goobahooda shaqo. Adeeggan ayaa laga hirgelin doonaa dhammaan 17-ka degmo ee Gobolka Banaadir iyo deegaannada ku hareeraysan. Iyadoo la adeegsanayo iskaashigan, Heelan Home Healthcare waxay fududeyn doontaa in bukaannadu helaan adeegyo caafimaad oo ay bixiyaan dhakhaatiir, kalkaaliyeyaal iyo xirfadlayaal caafimaad oo leh aqoon iyo khibrad sare, si loo xaqiijiyo sii wadidda daryeelka bukaanka iyo kor u qaadidda tayada adeegyada caafimaadka. Isbitaalka ayaa horey u bixin jiray adeegga ambalaasta 24 saac maalintii, 7 maalmood usbuucii (24/7), oo lacag la’aan ah, kaas oo bukaannada xaaladaha degdegga ah looga soo qaadi jiray xaafadahooda. Heshiiskan cusub ayaa sii ballaarinaya adeegyadaas, isagoo u suurtagelinaya bukaannada inay helaan daryeel caafimaad oo xirfad leh iyagoo jooga guryahooda ama goobahooda shaqo.